Dass die Krott net kabutt gäiht
Beim Kompost rimsetze machts uffåmol blubb, un die Mischtgawwel hot äijend äbs uffgspießt! Tatsächlich! Däss is e dicki, fätti Krott, wou do in dem Zinke stäckt!
Trotzdem hot die Krott Glick! Sie hots nemlich mirreme äschde Dierfreund se dou! Der Månn rifft seune Fra un velångt es erschde Hilfe Päckche!
Die Fraa vesucht mirreme sterile Läppche den Bauch vun dere Krott sauwe se mache. Debei will se die Lunge, die wiejen Schwamm aus dem Dier rausquillt, serick in den Korpus neupresse. Däss gäiht net rischdisch, wall imme wånn däss Dier schnaufe muss, die Lunge dånn wirre rauswitscht.
Noud hellt der Månn die Krott in de Henn, un die Fraa rennt åns Telefon, un rifft ehrn Veehdokte ou! Dånn packt sie die Krott in e nass Kichehandduch un alle Zwaa fohrn se schnurstraks zum Veehdokde! Sälle is a en Dierfreund! No klor!
Er leßt alle ånnen Diern emol wadde un veseugt glei die Krott! Se erscht macht er die Haut steril, un dånn neht er dere den Riß zu!
Er nimmt nix defer! Kå Honorar! Er säigd, dass es die Pflicht vun jedem Veehdokte wär, de wille Diern in Fäld un Flur se hälfe!
Alse der Månn un die Fraa nemme noud die zåmmegflickt Krott mit håm un setze die wirre in ehrn Gårde! Dort is nemlich e Gälriewegrube die wou mit Sägmähl ausgstraat is! Tatsächlich wiehlt sich die Krott do neu un sie hots gut getroffe! Däss is nemlich die reunscht Vorratskammer! Do gitts Schnägge, un Wärm un Spinne!
Die zåmmegeneht Krott is scheunba wirre gonz gut beinånne! Die krawwelt nemlich heit noch im Gårde rim un fraat sich, dasse läbt! Der Månn un die Fraa die fraae sich a! Nadierlich!
Das ist die Mundart vom oberen Gersprenztal- Beerfurth/Reichelsheim
Viel Spaß beim Lesen - !
Freundliche Grüße von der Erika Pöschl
å = Nasal Laut zwischen a und o
